Bei uns haums jetzt Baam aufgstöt. Na, net eipflaunzt. Aufgstöt. In Kiwen. De soin „die Strasse kühlen“, haums gsogt. Drei Wochn laung. Daun foans weida. De Baam. In d´näxte Gossn. Wengan Klimawaundl warats, haums gsogt. Wäu in da Stodt wiads imma wäama, do brauch ma mea Baam. Gscheida warats jo, waun ma s´ in d´ Ead setzat. Und steh lossat. Stott dos ma s´ umanaundaschiabt mitn Traktoa. Owa do gangatn hoit a poa Pakplätz drauf. Und des kaunst net mochn, wegn de Leit in dera neichn Siedlung. De woin eanare SUVs jo a irgndwohi stön.
Haas is´s.
Friara woa duat a Gstettn, do san vü Baam gstaundn. Und Buschn und Bleamln. Und Hosn hot´s gem, und Fuchsn und Födhaumsta. Owa des haums ois zuabetoniad und Hochheisa draufgstöt. Zwischndrin haums a klane Wiesn iwalossn, mit a poa vahungate Staudn und ana Hutschn. „Park“ hast des jetzt. Do wohnt sicha ka Haumsta mea. Und in letztn Hosn haums vurige Wochn ibafoan.
Haas is´s.
A neiche Umfoarungsstrossn woins a baun. Se woin kane Autos in da neichn Siedlung. Oiso kane, de do net heaghean. De soin eanare Obgase draussn lossn. - Ob da Wind eh waas, wo a´s daun hiblosn muas? - Dafia ziagt ma a Schneisn durchn Woid, brad wia a Autobahn. A poa tausnd Baam wean zu Pellets fia di „ökologische Heizung“. De Vicha kummen nimma driba, kummen nimma von eanare Bautn zum Fuada. Oba de Plakat von da
Fremdnvakehrwerbung zagn Wöda und Wiesn, Bleamen und Schmettaling. Manan de, dos de Touristn zum Plakat auschaun kumman?
Haas is´s.
Nem da Umforungsstrossn kummt a neichs Einkaufszentrum hi. Mit an muadstrumm Parkplotz, damit de Leit aus da neichn Siedlung mit eanare SUVs a hi kumman, wäu de Tramwei foat do jo net ausse. De Salotföda haums dafia zuabetoniat, und de Gäatnarei, wo i scho ois klana Bua es Obst ghoit hob, oda de Bleamen fia da Oma ian Gebuatstog, de hot a weg miassn. Des kau i ma jetzt ois ausn Supamoakt hoin, und waast eh, wie des Obst ausn Supamoakt schmeckt.
Haas is´s.
De Klimaunlogn rennan auf Teife kum ausse. Jo eh, haas wia aus da Höl´ kummts ausse. Ois, wos drinnen köda wiad, wiads draussn weama. Des vaschwindt jo net. Des frisst nua Stom. Oiso brauch ma a neichs Kroftwerk. Da lezte klane Boch im hintastn Toi im hechstn Gebirg wiad jetzt a no zuabaut, und Windradln stöns uman gaunzn Neisiedla See. Die
Auwöda vartrickan, fias Grundwossa muas ma imma tiafa buddln. Auf de Föda vadirrn de Paradeisa. Owa wuascht, mia importians eh aus Spanien und Griechenland. Mitn LKW. Fia den ma wieda neiche, no bradare Strossn baun. Und no mea Baam oschneidn.
Haas is´s.
Auf da Baustö sitzn a poa junge Leit um a poa Baam umadum. Damit de Bagga net weida grohm kennan, sogns.
Se woin kane neichn Strossn mea.
Se woin ka neiches Einkaufszentrum und kane Paradeisa aus Spanien.
Se woin ums Varecken a kane Baam in Kiwen.
I a net.
I setz mi dazua.
